González Huergo va liderar la candidatura de Podemos pa les eleiciones

Ganó nes primaries del partíu a la diputada Rosa María Espiño por un marxe escasu.

Un total de 1.009 persones participaron nes votaciones telemátiques pa escoyer a la candidata a l’alcaldía y el cuerpu de llista, de les que 509 optaron por Yolanda González Huergo (51,68 por cientu) y 476 por Espiño (48,32 por cientu), con 20 votos en blancu (1,99 por cientu). La ganadora lideraba la candidatura Ganar Xixón 2019, mientres que la diputada facía lo propio con Piensa Xixón.

D'esta forma, la destacada militante asturianista, xurista y téunicu n'Urbanismu, va ser la candidata de Podemos a les eleiciones municipales del 26 de mayu. Nes primaries tamién s’escoyía’l cuerpu de llista, resultando ente los dos más votaos persones que formaben parte de les dos candidatures, esto ye, Laura Tuero, de Ganar Xixón, y Alba González Sanz, de Piensa Xixón.

Los siguientes con más sofitos ente los venti candidatos presentaos foron Juan Miguel Chaves (Ganar Xixón), Alejandro Zapico (Piensa Xixón), Carlos Rodríguez González (Ganar Xixón), David Posada (Piensa Xixón), Inés Mallada (Ganar Xixón), María Alejandra Tejón (Piensa Xixón), Eve Blanco (Ganar Xixón) y Abdellahi Athman (Piensa Xixón).

Na semeya, González Huergo –nel centru de blancu–, col restu de persones que participen na llista de Ganar Xixón 2019.