El balón yá cuerre na Escuela de Mareo

El Sporting comenzó los entrenamientos coles ausencies d'Isma López y Carlos Castro.

Les pruebes médiques del llunes y ayeri dieron paso güei al trabayu físicu y téunicu de la pretemporada del club xixonés, que va buscar el saltu de categoría que dexó escapar la campaña pasada nes eliminatories pol ascensu contra'l Valladolid. La única cara nueva, amás de los futbolista procedentes del filial, foi'l mediu portugués André Sousa, ex internacional sub-21 que llega a Xixón cedíu pol Os Belenenses.

Los que yá nun tuvieron foron Isma López y Carlos Castro, xugadores qu'abandonen el club pa probar fortuna nel chipriota AC Omonia y nel Mallorca, de manera respeutiva. Asina, tuvieron a les órdenes de Rubén 'Pipo' Baraja, téunicu roxiblancu que celebra güei 43 años, Sousa, Pablo Fernández, Cordero, Traver, Juan Rodríguez, Mariño, Barba, Rachid, Álex Pérez, Babin, Pablo Pérez, Carmona, Isma Cerro, Pedro Díaz, Nacho Méndez, Cristian Salvador, Sergio Álvarez, Hernán, Canella y los porteros Mariño, Dani Martín y Christian Joel.

Tamién s'entrenó, énte la falta d'efeutivos nel ataque, el delanteru Gorka Santamaría, procedente del Recreativo y con esperiencia en Segunda col Bilbao Athletic y el Cádiz, que vieno a Xixón a reforciar al filial. Otra manera, el llateral derechu del Sporting de los primeros noventa, Arturo, incorporóse al cuerpu téunicu en cualidá de motivador.