L'Hostelcur Xixón trai de Portugal la so quinta Copa d'Europa

Les xixoneses superaron en Lisboa al equipu anfitrión, el Benfica, por 3-4 na final.

El club más esitosu d'Asturies siguen sumando campeonatos. L'Hostelcur Gijón Hockey Club, o lo que ye lo mesmo, el Club Patín Gijón-Solimar, algamó la so quinta Copa d'Europa de ḥoquei patinos femenín, desquitándose asina de la derrota na final del añu pasáu nel Palaciu de Deportes col Club Patí Voltregà por un solitariu gol de la xixonesa Natasha Lee y recuperando bones sensaciones de cara a revalidar el títulu d'OK Lliga tres perder hai dos selmanes la Copa por 2-1 al cayer col Calmar CP Vilanova.

L'afición del Benfica respondió y creó un ambiente favoratible pal equipu llocal, anque l'Hostelcur namái tardaría 2 minutos en marcar pol aciertu del refuerciu últimu, l'arxentina Julieta Fernández. Sousa pondría l'empate nel 6, anque María Díez 'Peke' adelantaría les asturianes enantes del descansu (1-2).

Nun baxaríen nunca los brazos les portugueses, qu'empataría otres dos vegaes tres los goles del Hostelcur. Primero nel minutu 28, por mediación de Rute Lopes, y llueu nel 34 de Sousa, poniendo'l 3-3 nel marcador depués del tantu de Marta González Piquero nel 29.

La ḷḷeniza convertiríase protagonista de la final al convertir tamién el gol decisivu nel minutu 37, colocando'l 3-4 definitivu. D'esta forma, l'Hostelcur conviértese en pentacampeón d'Europa, igualando al Voltregà nel palmarés de la competición, tres los trunfos del 2007, 2009, 2010 y 2012.

Nes semifinales, l'equipu catalán, ganador nes dos últimes ediciones de la 'final a cuatro' de la Copa d'Europa, cayía col Benfica por 5-4. Mentes, el conxuntu asturianu superó al portugués Stuart Massamá por 4-7.

A dos puntos del líder

Al campeonatu d'Europa y al subcampeonatu de Copa podría sumase la tercera OK Lliga nesta temporada, na que Rubén Muñoz garró les riendes del equipu tres la marcha de María Fernández Grande 'Pulgui'. L'Hostelcur ocupa agora, a falta de nueve xornaes pal final, la segunda plaza con 38 puntos, namái dos menos que'l líder, el Club Patí Manlleu.

El Voltregá ocupa la tercer plaza con 37 puntos, quedando más descolgáu'l Generali HC Palau de Plegamans con 36 y un partíu más xugáu.

Semeya obra de Marzia Cattini.