El Plenu aprueba por unanimidá les distinciones de la ciudá del 2018

L’Hostelcur Xixón va recibir la medaya d’oru de la ciudá tres aprobase nun Plenu estraordinariu les concesiones d’esti añu y el nomamientu de José Antonio García Santaclara como fíu adoptivu. Les de plata van ser pa l’Asociación Belenista, la Federación de Peñas Sportinguistas, Mar de Niebla, la Politéunica y la Sociedá Cultural Xixonesa.

Depués de dos años con diversidá de criterios ente los grupos municipales, nesta ocasión hebo consensu pal repartu de les distinciones de la ciuda, que se van entregar na festividá llocal de San Pedro. El club con meyor palmarés d’Asturies, l’Hostelcur Club Patín Gijón Solimar, actual campeón d’Europa y con opciones de revalidar el títulu de Lliga, va recibir la medaya d’oru de la ciudá.

Mentes, les de plata van repartise ente cinco coleutivos mui diversos de Xixón. Asina, nel ámbitu deportivu ta la Federación de Peñas Sportinguista; nel ámbitu asociativu, Mar de Niebla; nel educativu, la Escuela Politéunicu d’Inxeniería de Xixón; y nel cultural, la Sociedá Cultural Xixonesa y l’Asociación Belenista de Gijón.

Creador de la Fundación Siloé

El sacerdorte José Antonio García Santaclara va recibir el títulu de fíu adoptivu de Xixón. Natural del Morcín, lleva décades residiendo nel conceyu, onde creó la Fundación Siloé d’atención educativa y socio-sanitaria a coleutivos en situación de vulnerabilidá.