Les cais y parques de Xixón dedicaes a persones venceyaes al asturianu van formar parte d’una ruta

Del quioscu de Pachín de Melás a la Casa Natal de Gaspar Melchor de Xovellanos. 30 Días en Bici, en collaboración con Iniciativa pol Asturianu, ideó una ‘Ruta pol asturianu’ que percuerre cais y parques de Xixón y que va estrenase esti xueves baxo les esplicaciones de Daniel García de la Cuesta.

“Esta ruta ñaz col enfotu de dar a conocer, y esparder más, la figura de delles de les persones que tuvieron venceyaes a la llingua asturiana de dalguna manera y que tán ente los nomes de les cais xixoneses, faciendo, al empar, una alcordanza de la so xera”, espliquen los sos impulsores. En total son 7,5 quilómetros pa facer en bicicleta, anque tamién pue percorrese caleyando en cualquier momentu, que pasa pel quioscu de Pachín de Melás, la cai Caveda, L’Argandona (Xosefa Xovellanos), el parque Mánfer de la Llera, Pumarín (Pin de Pría), Fermín Canella, el parque Teodoro Cuesta, El Natahoyo (Federico González-Fierro Botas) y la Casa Natal de Gaspar Melchor de Xovellanos.

García de la Cuesta va facer de maestru de ceremonies na estrena de la ruta, prevista a les 19.30 hores de mañana con salida na plazuela San Miguel. En cada parada va lleer testos sobre los protagonistes de cada parada col envís de qu’a cada participante-y pruya la curiosidá y les complete más llueu, al so gustu y tiempu.

Esta actividá forma parte de les munches programaes n’abril por esti coleutivu con motivu de los 30 Díes en Bici, campaña mundial entamada pa fomentar l’usu diariu d’esti mediu de tresporte na ciudá. Los participantes han de comprometese a facer un trayeutu tolos díes del mes, yá sía curtiu o llargu, y compartilo en redes sociales.