Regalu pa los nacíos en Xixón
|
5 Ochobre, 2017 por Redacción
La Oficina de Normalización Llingüística de Xixón retoma esti mes d’ochobre, en collaboración col Hospital de Cabueñes, la campaña ‘El llibru pa lo más piquiñino de casa’.
Esta campaña ta empobinada a les mas y los pas qu'acaben de tener un fíu o una fía, afalándolos a que-yos tresmitan la llingua asturiana nesti periodu tan importante de los primeros años, que tanto va repercutir nel futuru de lo más piquiñino. Dende l’Hospital de Cabueñes van entregase esti añu 750 exemplares de la publicación a les nueves families, nel momentu de tornar pa casa col rapacín o rapacina.
Trátase d’un prestosu cuadernu onde les families van apuntando los datos y vezos del neñu o neña, asina como la so evolución dende la nacencia, espacios pa semeyes d’alcordanza, amás de pa les persones que los curien y afalaguen. Tamién hai apartaos con pallabres prestoses venceyaes a la reciella o nomes de persona n’asturianu, que podéis emplegar si apuerta dalgún otru miembru a la familia.
