Manifestación antitaurina'l domingu 13

L'asociación en defensa de los derechos de los animales ANADEL convoca una manifestación antitaurina en Xixón pa esti domingu 13 d’agostu. La protesta va salir de la plazuela San Miguel a les 16:30 hores y tien como lema "Contra la tortura". Esti actu cuenta col sofitu de más de trenta colectivos, y coincide cola celebración nel cosu d'El Bibio de Xixón de la feria taurina de Begoña.

Esti tipu de concentraciones recientes contra los festexos taurinos, sicasí, nun son novedoses na ciudá. Ta documentao que'l 15 d'agostu del 1914, la Sociedad Antiflamenquista Cultural y Protectora de Animales y Plantas entamara una xira n'El Coto pa protestar contra los toros n'El Bibio, axuntando a más de 4.000 persones.

Asina, queda constancia del refugu qu'esti tipu d'actividaes tuvieron dende siempre n'Asturies ente la población. Gaspar Melchor de Xovellanos yá destacaba en 'Memoria para el arreglo de la policía de los espectáculos y diversiones públicas, y sobre su origen en España' cómo estos festexos nun teníen raigañu en tolos puntos del Estáu y cómo nun suponía una diversión pa gran parte de la población.

D'igual forma, la construcción d'El Biblio nel 1888 vendióse como un reclamu turísticu, non como una demanda de los xixoneses. Inclusive, anguaño, gran parte de los asistentes a la Feria de Begoña, la única del país, son procedente de fuera, nun consiguiendo siquier asina enllenar la plaza de toros.