Día de les Lletres Asturianes

El Día de les Lletres Asturianes ye la xornada cola que los asturianos homenaxamos a la nuesa lliteratura. Vien celebrándose dende l’añu 1980.

L’Academia de la Llingua Asturiana (ALLA) entama nesti día, que coincide col primer vienres de mayu, un actu oficial públicu onde se fai homenaxe y vindicación de la llingua asturiana per aciu de la so manifestación lliteraria. Nél tien llugar una xunta estraordinaria de la institución cola acoyida de nuevos académicos y el discursu presidencial. Esti añu como novedá  va entregase al escritor Xuan Bello'l I Premiu Nacional de Lliteratura. Ye vezu celebralu nel Teatru Campoamor d'Uviéu.

Enantes del actu de l'ALLA percorrera peles cais d'Uviéu una manifestación empobinada pola Xunta pola Defensa de la Llingua Asturiana pa reclamar la oficialidá del idioma. Nesta ocasión van presentar el ‘Proyeutu 2018 pa la Oficialidá’, que busca echar a andar una reforma del Estatutu al tener los sofitos suficientes.

Selmana de les Lletres Asturianes

Xixón continúa la selmana qu'entra acoyendo actividaes dientro de la Selmana de les lletres asturianes. Pal llunes 8 va representase l'espectáculu 'Histories Detectivesques' de Guayominí Producciones p'alumnáu d'Educación Primaria nel Teatru de La Llaboral a les 11 hores. Y el martes 9 de mayu tendremos a les 11 hores, tamién nel Teatru de la Llaboral, l'espectáculu  'Disculpe, caballeru' de Zig Zag Danza, p'alumnáu d'Educación Secundaria.