Termes Romanes de Campu Valdés

El muséu de les Termes Romanes de Campu Valdés, inauguráu en 1995, ye un equipamientu próximu a la mariña, asitiáu nel corazón de la ciudá antigua de Xixón y concebíu como un muséu de sitiu.

Los sos oxetivos principales son la protección, caltenimientu, investigación, divulgación y presentación didáctica de los restos recuperaos nes escavaciones arqueolóxiques.

La visita al muséu articulase en dos estayes: una parte introductoria ufiértanos una visión completa de les termes nel mundu romanu y el funcionamientu y hestoria de les termes públiques de Xixón. Por aciu d'una proyección, maquetes, testos y dibuxos ilustrativos indíquense les funciones y les actividaes propies d'estos edificios.

De siguío, atópense los restos arqueolóxicos. El percorríu realízase al traviés d'una pasarela que reproduz la circulación interior de les termes y dexa reparar les estancies orixinales de los baños. xuntu al xacimientu amuésense oxetos y restos arqueolóxicos que nos dexen conocer les técniques constructives, la vida cotidiana, la flora y la fauna de la dómina.