L'espaciu forestal asturianu na conferecia mensual d'Ástura

|
L'espaciu forestal asturianu na conferecia mensual d'Ástura

Col títulu de ' Fayeos, pinales, ocaliteres, cotoyales..., l'espaciu forestal d'Asturies y propuestes de futuru' esti martes 20 de xunu va falar l'inxenieru montes Dolfo Blanco de la Parte del espaciu forestal asturianu.

Esti martes 20 de xunu a les 19:30 hores nel llar del Atenéu Obreru de Xixón (C/Cuadonga, 7) va celebrase la charra mensual de l'asociación cultural Ástura, dedicaca nesta ocasión alespaciu forestal que –lloñe de ser daqué parao– evoluciona y camuda, magar qu’a un ritmu estremáu al de la visión humana.

Nesta conferencia esbiyaranse los componentes cimeros que llenden el resultáu del paisaxe forestal d’anguaño y nesta conferencia va facese un repasu del so camín a lo llargo la hIstoria. Falando de los principales esmolecimientos y alderiques más abegosos que xurden nel presente, como son los fueos y los acotaos, asina como los llanteros d’ocalitos y la conservación de la biodiversidá. Pa rematar daranse unes llinies de futuru, dende l’enfotu de puxar pola sostenibilidá ambiental, social y económica.

Dolfo Blanco de la Parte estudió Inxeniería Téunica Forestal y Inxeniería de Montes na Escola Politécnica Superior de Lugo (Universidá de Santiago de Compostela).  En 2005, con otros dos socios, creó la empresa BIESCA INXENIERÍA, col envís d'ufiertar servicios d’inxeniería y consultoría agroforestal y ambiental. Xunto cola xestión forestal, en 2011 entamen a poner en marcha proyeutos productivos venceyaos al monte y a la agroalimentación, creando con otros socios LA CASERÍA DE TIERRA ASTUR, que dispón d'espacios silvopastorales pa la cría de races de ganadería del país. Anguaño cuenta con un monte de 45 ha nel que se ta criando gochu asturcelta. En 2015 crease BIESQUES, una entidá pa la certificación grupal de la xestión forestal sostenible FSC (Forest Stewardship Council) y pa reforzar l'apuesta poles inversiones en productos y servicios del monte. Dende 2015 invierte en plantaciones de pumaraes de sidre en collaboración cola coperativa CAMPOASTUR.  Y en 2017 asóciase a la empresa d'hostelería, consultoría gastronómica y desendolque de productos agroalimentarios 40 PRIMAVERES. Ye miembru de PROFOR (Asociación de Profesionales Forestales, Ricardo Codorniú) y de PROSILVA (Asociación que promueve una selvicultura averada a la naturaleza).

Contador Estadistiques